கண்ணோட்டம் – திருக்குறள்

16 நவ்

1. கண்ணோட்டம் என்னும் கழிபெரும் காரிகை
உண்மையான் உண்டுஇவ் வுலகு.

கண்ணோட்டம் என்று சொல்லப்படுகின்ற மிகச் சிறந்த அழகு இருக்கும் காரணத்தால்தான், இந்த உலகம் அழியாமல் இருக்கின்றது.
571

2. கண்ணோட்டத்து உள்ளது உலகியல்; அஃதிலார்
உன்மை நிலக்குப் பொறை.

கண்ணோட்டத்தினால் உலகியல் நடைபெறுகின்றது; கண்ணோட்டம் இல்லாதவர் உயிரோடு இருந்தால் நிலத்திற்குச் சுமையே தவிர, வேறு பயனில்லை.
572

3. பண்என்னாம் பாடற்கு இயைபின்றேல்: கண்என்னாம்
கண்ணோட்டம் இல்லாத கண்?

பாடலோடு பொருந்துதல் இல்லையானால் இசை என்ன பயனுடையதாகும்? அதுபோல், கண்ணோட்டம் இல்லாவிட்டால் கண் என்ன பயனுடையதாகும்?
573

4. உளபோல் முகத்துஎவன் செய்யும் அளவினால்
கண்ணேட்டம் இல்லாத கண்?

தக்க அளவிற்குக் கண்ணோட்டம் இல்லாத கண்கள் முகத்தில் உள்ளவைபோல் தோன்றுதல் அல்லாமல் வேறு என்ன பயன் செய்யும்?
574

5. கண்ணிற்கு அணிகலம் கண்ணோட்டம் அஃதின்றேல்
புண்ணென்று உணரப் படும்.

ஒருவனுடைய கண்ணுக்கு அணிகலமாவது கண்ணோட்டம் என்னும் பண்பே; அஃது இல்லையானால் புண் என்று உணரப்படும்.
575

6. மண்ணோடு இயைந்த மரத்தனையர் கண்ணோடு
இயைந்துகண் ணோடா தவர்.

கண்ணோட்டத்திற்கு உரிய கண்ணோடு பொருந்தி இருந்தும் கண்ணோட்டம் இல்லாதவர், (கண் இருந்தும் காணாத) மரத்தினைப் போன்றவர்.
576

7. கண்ணோட்டம் இல்லவர் கண்ணிலர், கண்ணுடையார்
கண்ணோட்டம் இன்மையும் இல்.

கண்ணோட்டம் இல்லாத மக்கள் கண் இல்லாதவரே ஆவர். கண் உடைய மக்கள் கண்ணோட்டம் இல்லாதிருத்தலும் இல்லை.
577

8. கருமம் சிதையாமல் கண்ணோட வல்லார்க்கு
உரிமை உடைத்துஇவ் வுலகு.

தம் தம் கடமையாகிய தொழில் கெடாமல் கண்ணோட்டம் உடையவராக இருக்கவல்லவர்க்கு, இவ்வுலகம் உரிமை உடையது.
578

9. ஒறுத்துஆற்றும் பண்பினார் கண்ணும்கண் ணோடிப்
பொறுத்துஆற்றும் பண்பே தலை.

தண்டித்தற்குரிய தன்மை உடையவரிடத்திலும் கண்ணோட்டம் செய்து, (அவர் செய்த குற்றத்தைப்) பொறுத்துக் காக்கும் பண்பே சிறந்தது.
579

10. பெயக்கண்டும் நஞ்சுஉண்டு அமைவர் நயத்தக்க
நாகரிகம் வேண்டு பவர்.

யாவராலும் விரும்பத்தக்க நாகரிகமான கண்ணோட்டத்தை விரும்புகின்றவர், பழகியவர் தமக்கு நஞ்சு இடக்கண்டும் அதை உண்டு அமைவர்.

யூதாஸ்களை காட்டிக் கொடுப்பவர்கள்

1 அக்

யூதாஸ்களை கயவர் என்றே
எல்லோரும் அறிந்து வைத்திருக்கிறார்கள்;

ஆனால் சிலர் யூதாஸ்களை
வேறுபடுத்தியும் அறிகிறார்கள்;

மொஹஞ்சதாரோவைச் சேர்ந்த யூதாஸ் எனில்
கழுவில் ஏற்றத் துடிக்கிறார்கள்;

லோத்தல் யூதாஸ் என்றால்
அரசனாக்குவது தகும் என விவாதிக்கிறார்கள்;

கங்கைச் சமவெளித் தவளைகள்
சிந்துச் சமவெளி வாரிசுகளானால்
வேறு என்ன நடக்கும்?

அப்பாவிகளை நூற்றுக் கணக்கில் கொன்று குவிப்பதில்
வேறுபாடு காண கற்றுக் கொடுக்கும்.

  • கடைசி விருந்து அருந்தியவர்களால் மட்டுமே
    யூதாஸ்களை காட்டிக் கொடுக்க முடிகிறது;

    கசந்து போவதன் மூலமே
    கடைசி விருந்து என்பது அறியப்படுவதாலும்;

    முன்னம் பலமுறை கசக்காத
    விருந்து அருந்தியவர்கள் என்பதாலும்;

    வலப்புறமும், இடப்புறமும் திருடர்கள் சூழ
    கதறுகிறார்கள், காட்டிக் கொடுத்தவர்கள்.

    போருக்குத் தயாராகிறார்கள்,
    அப்பாவிகளின் குருதிகளால்
    அரசபாட்டை அமைக்கும் யூதாஸ்கள்

    தேர்க்கால்களின் மீதேறி ஒருவன்;
    சொர்க்கத்திற்கு போவதாகச் சொல்லும்
    பொய்க்கால் குதிரை மீதேறி மற்றொருவன்.

    ஆண்டர்ஸ் பிரெய்விக்கும், சு.சுவாமியும்!

    8 ஆக

    படையப்பா படத்தில் ஒரு காட்சி: ஆற்றோரம் படித்துறையில் அமர்ந்து, தனது நண்பர்களுடன் வெட்டி அரட்டை அடித்துக் கொண்டிருப்பார் ரஜினி. தமது காதலி எப்படிப்பட்டவள் என்பதை, பெண்களுக்குரிய 3 இலக்கணங்களை(?) "சாத்விகம், பிரச்சோதகம், பயானகம்" எனச் சொல்லி விளக்கிக் கொண்டிருப்பார். கூட இருக்கும் நண்பர், பார்வையாளர்களைப் போலவே கடுப்பாகி "என்ன சாச்சகம் பச்சோசகம்" என்பார். உடனே ரஜினிக்கு கோபம் வந்து விடும். "இது சமஸ்கிருதம்…தேவ லிபி….சரியா உச்சரிக்கனும்" என்று எச்சரிக்கை விடுப்பார். அப்படியானால் தமிழ் என்ன "நீச பாஷையா?" உனது விருப்பத்திற்கு உச்சரிக்க என்று மானமுள்ள தமிழர்கள் காலில் கிடந்ததைக் கழற்றி இருந்தால், "நீ பேசும் தமிழ் அழகு" என்ற பாட்டுக்கு தேவை இருந்திருக்காது.

    இவரைப் போலவே, தான் பேசும் தமிழ் அழகு என்று நினைத்துக் கொண்டிருக்கும் மற்றொரு ஆள் சு.சுவாமி (அதாங்க.. சுப்பிரமணியன் சுவாமி. சுப்பிரமணியன் என்பதற்கு நேர்ப் பொருள் தெரியுமா? "பிராமணர்க்கு நல்லவன்". "பிராமணீயத்திற்கு நல்லவன்" என்று நாம் பொருத்தமாகக் கருதிக் கொள்வோம்).

     

    vhp-leader-ashok-singhal-061209120825

    பெயருக்கு ஏற்ற வேலையை கனகச்சிதமாக செய்து வரும் இந்த அம்பி, அண்மையில் டிஎன்ஏ (டெய்லி நியூஸ் அண்டு அனாலிசிஸ்) என்ற நாளிதழில் நடுப்பக்க கட்டுரை எழுதியிருந்தார். மும்பை தொடர் குண்டுவெடிப்பை அடுத்து எழுதப்பட்டிருந்த இந்த கட்டுரையை, ஒரு வரியில் கூறுவது என்றால் ஆர்எஸ்எஸ் துண்டுப் பிரசுரம் எனலாம். இஸ்லாமிய பயங்கரவாதத்தை துடைத்தெறிவது எப்படி? (How to wipe out Islamic terror?) என்ற அந்தக் கட்டுரை, மும்பை தொடர் குண்டுவெடிப்பிற்கு காரணம் இஸ்லாமிய பயங்கரவாதிகள்தான் என்று முடிவு கட்டுகிறது. சரி, அவர்களை ஒடுக்குவதற்கு அந்தக் கட்டுரையில் பரிந்துரைக்கப்பட்டிருந்த வழிதான் என்ன? ஜம்மு-காஷ்மீருக்கு அரசமைப்புச் சட்டத்தின் மூலம் வழங்கப்பட்டுள்ள சிறப்புரிமைகளை (பிரிவு 371) பறிக்க வேண்டும்; வாரணாசியில் (காசி) உள்ள ஞானவபி (ஞானம் ஊறும் கிணறு) மசூதியை இடித்துவிட்டு காசி விசுவநாதர் கோவில் கட்ட வேண்டு்ம்; இதுபோல நாடு முழுவதும் கோவில் தலங்களில் உள்ள 300 மசூதிகளை அகற்ற வேண்டும்; தங்கள் மூதாதையர்கள் ஹிந்துக்களதான் என்பதை பெருமிதத்துடன் ஒப்புக் கொள்ளாத முஸ்லிம்களின் வாக்குரிமையப் பறித்து, அவர்களை இரண்டாந்தரக் குடிமக்களாக்க வேண்டும்; இந்தியாவை (அதாவது மதச்சார்பற்ற குடியரசு என இருப்பதை), இந்து ராஷ்டிரமாக அறிவிக்க வேண்டும்… என ஆர்எஸ்எஸ்சின் கொள்கைத் திட்டங்களை உள்ளடக்கி பட்டியல் நீள்கிறது. இதுதான் "பிராமணீயத்திற்கு நல்லவன்" பரிந்துரைக்கும் வழி.

    அறிவு, நாணயம் துளியாவது அந்த நாளிதழுக்கு இருந்திருந்தால் சு.சுவாமியின் கட்டுரை பதிப்பிக்கப்பட்டிருக்காது என்பது ஒருபுறமிருக்கட்டும். அறிவு நாணயமுள்ளவர்கள் சிந்தித்துப் பாருங்கள், இந்தியாவில் "இஸ்லாமிய தீவிரவாதத்தை" உருவாக்கி வளர்த்து விட்டிருப்பது இத்தகைய எண்ணமும், இதுபோன்ற சொல்லும், இதை நடைமுறைப்படுத்த முனையும் செயல்களும்தானே! (சு.சுவாமி கட்டுரைக்கு எதிர்வினையாற்றியிருந்த டிஎன்ஏ வாசகர்களில் சிலர் அவரை இந்துத் தாலிபான் என மிகப் பொருத்த வர்ணித்திருந்தனர்).

    தீயை அணைப்பதற்கு வழி சொல்கிறேன் என்ற பெயரில், எரிகிற நெருப்பி்ல் எண்ணையை ஊற்றுங்கள் என்கிறார் சு.சுவாமி. ஏன் அவர் அப்படிச் சொல்ல வேண்டும்? இந்து நடுத்தர வர்க்க உளவியலை நஞ்சாக்கி, அதிகாரத்தைக் கைப்பற்றும் நோக்கம்தான். இத்தகைய குண்டுவெடிப்புகளின் மூலம் ஆதாயம் அடையும் சக்திகள், நெருப்பின் வேகம் எதிர்பார்த்த அளவில் இல்லாதபோது அதை ஊதிப்பெருக்க நினைப்பதில் வியப்படைய ஒன்றுமில்லை. உண்மையிலேயே மும்பை தொடர் குண்டுவெடிப்பை இஸ்லாமிய பயங்கரவாதிகள் நிகழ்த்தியிருந்தால் அதற்காக அவர்கள் வெட்கப்பட வேண்டிய இடமும் இதுதான்: இந்துத்வா பயங்கரவாதிகள் அதிகாரத்தை அடைய குண்டுவெடிப்புகள் பாதை சமைத்து தருகின்றன. பாபர் மசூதி இடிப்புக்கு முன், பாபர் மசூதி இடிப்புக்குப் பின் என இந்திய வரலாற்றைப் பகுத்துப் பாருங்கள். உண்மை எளிதில் விளங்கும். 

    சரி, மும்பை குண்டுவெடிப்புக்கு "இஸ்லாமிய பயங்கரவாதிகள்"தான் காரணம் என சு.சுவாமி முடிவுக்கு வந்தது எப்படி? ஏன் காவி பயங்கரவாதிகளோ அல்லது இந்துத்வா பயங்கரவாதிகளோ இதற்கு காரணமாக இருக்க முடியாதா? இந்தக் கேள்வி ஞாயமற்றது (நியாயமற்றது) என யாரும் ஒதுக்கிவிட முடியாது என்பதைத்தான் நார்வே பயங்கரவாதத் தாக்குதல் நமக்கு உணர்த்துகிறது.

    நார்வேயில் நடந்தது என்ன?

    Smiling youngsters listen to a speech during the Norwegian Labour Party youth camp on Utoya Island, just 24 hours before gunman Anders Breivik shot dead 68

    2011 ஜூலை 22-ம் நாள் மாலை. நார்வே தலைநகர் ஆஸ்லோவிற்கு வெளியே அமைந்துள்ள உட்டோயா தீவில் அந்நாட்டு இளையர்கள் அரசியல் பயில்வதற்காக ஆர்வத்துடன் கூடியிருந்தனர். அது ஆளும் தொழிலாளர் கட்சியின் இளைஞர் முகாம். திடீரென காவல்துறையினர் உடையில் புகுந்த வெறியன் ஒருவன் எந்திரத் துப்பாக்கியால் கண்மூடித்தனமாக சுட்டதில் 69 பேர் கொல்லப்பட்டனர். அதற்கு இரண்டு மணி நேரத்திற்கு முன்னதாக, தலைநகர் ஆஸ்லோவில் பிரதமர் அலுவலகத்திற்கு வெளியே கார் குண்டு வெடித்ததில் 8 பேர் கொல்லப்பட்டிருந்தனர்.

    The blast in Oslo was outside a government office

    Seven people were killed in the Oslo bomb blast

    இரண்டாம் உலகப் போருக்குப் பின்னர் நார்வேயில் அதிகளவில் உயிர்களைப் பலி கொண்ட இந்த இரட்டை தாக்குதலுக்கு காரணம், அல்கொய்தா அல்லது ஏதோ ஒரு இஸ்லாமிய தீவிரவாத அமைப்புதான் காரணம் என உலகின் முன்னணி ஊடகங்களே செய்தி வெளியிட்டன. நபிகள் நாயகத்தை கேலி செய்து சித்திரம் வெளியிட்ட அண்டை நாட்டு டென்மார்க் பத்திரிகைகளைப் பற்றிக் கேட்கவே வேண்டாம்.

    ஆனால், இவர்கள் முகத்தில் கரியைப் பூசும் வண்ணம், பயங்கரவாதத் தாக்குதலை நடத்தியது ஆண்டர்ஸ் பெரிங் பிரெய்விக் என்ற வலதுசாரி தீவிரவாதி என்றும், அவன் கிறிஸ்தவ மத நிறுவனத்தின் ஊழியன் என்பதும் (Anders Behring Breivik is a member of the John lodge St. Olaus TD Three pillars of the Norwegian Masonic Order. He has the status of the 3rd degree, where the highest order is the 10th degree) பின்னர் உறுதிப்படுத்தப்பட்டது.

    Anders Behring Breivik

    இவன் இந்த கொலைபாதகச் செயலில் ஈடுபடுவதற்கு முன்னர் 1,518 பக்கங்கள் கொண்ட கொள்கை அறிக்கையை வெளியிட்டுள்ளான். அதில் அவன் சு.சுவாமி வகையறாக்களை 102 பக்கங்களில் புகழ்ந்து தள்ளியிருப்பதுதான் இங்கு உன்னிப்பாகக் கவனிக்க வேண்டிய விசயம். இதுபற்றி தி இந்து நாளிதழில் வெளியான செய்தியின் தமிழ் வடிவம்:

     

    "

     

    மக்களை கூட்டம் கூட்டமாக கொன்று குவித்த
    நார்வே கொலைகாரன்
    இந்துத்வாவிற்கு பாராட்டு!

    புது டெல்லி, ஜூலை 26, 2011

    இந்தியாவின் ‘இந்துத்வா’வாதிகளின் குறிக்கோள்கள்,
    சிலுவைப் போர் வீரர்களுடன் ஒத்திருப்பதாகக் கூறுகிறான்
    ஆண்டர்ஸ் பிரெய்விக்

    உலகம் முழுவதும் உள்ள ஜனநாயக அரசுகளை வீழ்த்துவதற்கான உலகளாவிய போராட்டத்தில் இந்தியாவின் இந்துத்வா இயக்கம் முக்கியமான கூட்டாளி என பாராட்டியுள்ளான், மக்களை கூட்டம் கூட்டமாக கொன்று குவித்த நார்வே கொலைகாரன் ஆண்டர்ஸ் பெஹ்ரிங் பிரெய்விக்.

    (அவன் இணையத்தின் மூலம் வெளியிட்ட) "2080: ஒரு ஐரோப்பிய விடுதலை அறிவிப்பு" ஆனது, பயங்கரவாதச் செயல்பாடுகளில் இருந்து, மக்கள் திரள் கொலை ஆயுதங்களைப் பயன்படுத்தும் ஒரு உலகளாவிய போருக்கு முன்னேறும் ஒரு இயக்கத்தை – கலாச்சார மார்க்சியவாத ஒழுங்கை வீழ்த்துவதை நோக்கமாகக் கொண்ட – சிலுவைப் போர் வீரர்கள் என்ற எதிர்கால அமைப்பிற்கான திட்டத்தை விவரிக்கிறது.

    இந்த 1518 பக்க கொள்கை அறிக்கையில், குறிப்பிடத்தக்க 102 பக்கங்களில் இந்தியா இடம்பெறுகிறது. தனது சிலுவை வீரர்கள் அமைப்பானது "சனாதன கொள்கை இயக்கங்களையும் மற்றும் பொதுவாக ‘இந்துத்வா’-வாதிகளையும் ஆதரிக்கும்" என்று அதில் கூறுகிறான், பிரெய்விக். அந்த கொள்கை அறிக்கையின் 3.158-வது பிரிவில், "தங்களது ஐரோப்பிய சகோதரர்கள் சந்தித்து வரும் அதே அடக்குமுறை துன்பங்களை,  ‘இந்துத்வா’-வாதிகளும் இந்தியாவின் கலாச்சார மார்க்சியவாதிகளால் அனுபவித்து வருவதாக" விளக்கமளித்துள்ளான் அவன்.

    "முஸ்லிம்களை தாஜா செய்தல்"

    ஐக்கிய முற்போக்கு கூட்டணி அரசானது, முஸ்லிம்களை தாஜா செய்வதிலும், கீழ்சாதி இந்துக்களை பொய் சொல்லியும், அச்சுறுத்தியும் சட்டவிரோதமாக மதமாற்றும் கிறிஸ்தவ மிஷனரிகளையும், ஹிந்து நம்பிக்கையையும், கலாச்சாரத்தையும் முழுமையாக அழிக்க விரும்பும் கம்யூனிஸ்டுகளையும் சார்ந்து இருக்கிறது (என்கிறான் பிரெய்விக்)..

    வெளிநாடுகளில் வாழும் இந்துக்கள் இந்தியாவில் நடப்பதை கழுகுப் பார்வையில் புரிந்து கொண்டிருந்தாலும் இந்தியாவில் வாழும் இந்துக்கள் அதை புரிந்து கொள்ளவில்லை (என்பதும் அவன் வேதனை).

    "இந்த அநீதியைப் பொறுத்துக் கொள்ளாத மற்றும் நிலைமை கைமீறிப்போகும்போது கலவரத்தில் ஈடுபட்டு முஸ்லிம்களைத் தாக்கும்" இந்துக் குழுக்களை பிரெய்விக்கின் கொள்கை அறிக்கை பாராட்டுகிறது. ஆனால் "இந்தச் செயல்பாடு உரிய பயன்களைத் தருவதில்லை" என்று கூறும் அவன், "முஸ்லிம்களைத் தாக்குவதற்குப் பதிலாக இந்தியாவில் உள்ள வகை ஏ மற்றும் பி துரோகிகளை குறிவைக்க வேண்டும்; தீவிரவாதக் குழுக்களை உருவாக்க வேண்டும்; கலாச்சார மார்க்சிய அரசை தூக்கியெறிய சுறுசுறுப்பாக முயற்சி செய்ய வேண்டும்" என்கிறான்.

    "இந்திய மற்றும் ஐரோப்பிய எதிர்ப்பியக்கங்கள் ஒன்றிடமிருந்து ஒன்று கற்றுக் கொள்ள வேண்டும். நமது லட்சியங்கள் ஏறக்குறைய பொதுவானவை" (என ‘இந்துத்வா’-வாதிகளை பார்த்துக் கூறுகிறான்) பிரெய்விக்

    இணைய தளங்களின் பட்டியல்

    மேற்கொண்டு தகவல்களை தெரிந்து கொள்ள பார’தீய’ ஜனதா கட்சி, ஆர்எஸ்எஸ், அகில பார’தீய’ வித்யார்த்தி பரிஷத் மற்றும் விஸ்வ இந்து பரிஷத் ஆகியவற்றின் இணைய தளங்களை பட்டியலிடுகிறான் பிரெய்விக்.

    இந்திய உள்நாட்டுப் போரில் ‘இந்துத்வா’வாதிகளுக்கு ராணுவ ஆதரவு வழங்கவும், இந்தியாவில் இருந்து அனைத்து முஸ்லிம்களையும் நாடு கடத்தவும் அவனது கொள்கை அறிக்கை உறுதிபூணுகிறது. இது, அனைத்து மேற்குலக ஐரோப்பிய பனமுகக் கலாச்சார அரசுகளை தூக்கியெறிவது மற்றும் ஐரோப்பிய மண்ணி்ல் இருந்து அமெரிக்கா ராணுவத்தினரை வெளியேற்றுவது என்ற பரந்த திட்டத்தின் ஒரு பகுதி என்றும் அவன் வரையறுக்கிறான்.

    ரஷ்யா, பிலிப்பைன்ஸ், சீனா மற்றும் தாய்லாந்து உள்ளிட்ட பல்வேறு நாடுகளில் ஒன்றாக இந்தியாவைக் காண்கிறான். இங்கெல்லாம் தன்னுடைய வழித்தோன்றல்கள் போரை முன்னெடுத்துச் செல்வார்கள் என நம்பிக்கை தெரிவிக்கிறான்.

    (ஆர்எஸ்எஸ்சின் வாய் என்று தூற்றப்பட்ட) வரலாற்றாய்வாளர்கள் கே.எஸ்.லால் மற்றும் சிறீநந்தன் வியாஸ் ஆகியோரின் நூல்களை மேற்கோள் காட்டி இஸ்லாமிய நெறியால் ஐரோப்பாவுக்கு அச்சுறுத்தல் என்கிறான், பிரெய்விக். கி.பி. 1000-1525 காலகட்டத்தில் லட்சக் கணக்கான இந்துக்கள் கொல்லப்பட்டதை அவர்களது நூல்கள் நிறுவுவதாக கூறுகிறான். (மோசடி ஆய்வாளர் என்று அஸ்கோ பர்போலா உள்ளிட்ட வரலாற்று ஆய்வாளர்களால் தூற்றப்பட்ட) என்.எஸ்.ராஜாராமையும் மேற்கோள் காட்டத் தவறவில்லை அவன்.

    எதிர்காலத்தில் தன்னுடைய அமைப்பானது, "இந்து, புத்த, யூத பகுதிகளில் தேசியவாத இந்து, புத்த, யூத  மற்றும் (ஐரோப்பியர் அல்லாத) நாத்திக படைகளுடனான ராணுவ ஒத்துழைப்புக்கு பதக்கஙகளை வழங்கும்; இந்த முயற்சிகள் ஜிகாதி மற்றும் கலாச்சார மார்க்சிய படைகள், பணியாளர்கள் அல்லது நலன்களுக்கு எதிராக முடுக்கிவிடப்பட வேண்டும்" என்று கனவு காணுகிறான் அவன்.

    இந்த பதக்கங்களில், "இந்தியப் பகுதியில் இருந்து இஸ்லாமிய நெறியை விரட்டியடிப்பதற்கு இந்துத்வாவாதிகளுக்கு உதவியதற்காக" வழங்கப்படும் "இந்திய விடுதலை சேவை பதக்கமும்" அடக்கம்.

    பிரெய்விக்கின் வீரர்கள் இந்துத்வாவாதிகளுடன் தோளோடு தோளாக இணைந்து போரிட்டாலும் கூட, (பிரெய்விக் கனவு காணும்) வலதுசாரிப் புரட்சிக்கு  பிந்தைய ஐரோப்பாவில் இந்துக்களின் உரிமைகள் வரம்பிடப்பட்டதாகவே இருக்கும். வங்கதேசம், பாகிஸ்தான் மற்றும் இந்தியாவைச் சேர்ந்த முஸ்லிம்-அல்லாதவர்களைக் கொண்டு வேலைக்கார (சூத்திர) வகுப்பு ஒன்று உருவாக்கப்படும். இவர்கள் ஒப்பந்த அடிப்படையில் ( 6 மாதம் அல்லது ஓராண்டு) ஐரோப்பா வரவழைக்கப்பட்டு, 12 மணி நேரம் வேலை வாங்கப்படுவார்கள். ஒப்பந்த காலம் முடிந்த பின்னர் அவரவர் தாயகத்திற்கு திருப்பி அனுப்பப்படுவார்கள். ஐரோப்பாவில் வேலை செய்யும் காலத்தில் பெரு நகரங்களில் முன்னரே வரையறுக்கப்பட்ட பகுதிகளில், ஒதுக்கப்பட்ட சமுதாயங்களாக வாழ்வார்கள் என்றும் தனது கொள்கை அறிக்கையில் கூறுகிறான், பிரெய்விக்.

     

    "

     

    இதைப் படித்து முடிக்கும் ஒருவர், சிந்தனை அளவில் பிரெய்விக், இந்துத்வா-வாதிகளோடு எவ்வளவு துல்லியமாக ஒத்துப்போகிறான் என வியக்காமல் இருக்க முடியாது. இங்கும் கூட ஆர்எஸ்எஸ் கனவு காணும் ராமராஜ்ஜியம் என்பது வர்ணாசிரம தர்மத்தின் வேறு பெயர்தான் என்பதை யாரேனும் மறுக்க முடியுமா?
    இறுதியாக ஒன்று, நார்வே தாக்குதலை பிரெய்விக் தனியனாக நிகழ்த்தியிருக்கலாம். ஆனால் அவனது கூட்டாளிகள் சு.சுவாமியைப் போல உலகமெங்கும் விரவிக் கிடக்கிறார்கள் என்பதை மறந்துவிடாதீர்கள்.

    எடியூரப்பாவின் ஊழல்தான், ஆர்எஸ்எஸ்சின் அறநெறியா?

    31 ஜூலை

    YEDDY

    ரு வழியாக, கர்நாடக முதலமைச்சர் பதவியில் இருந்து விலகிவிட்டார், எடியூரப்பா. அவர் ஒரு "ஊழல் பெருச்சாளி" என்பதில் பார’தீய’ ஜனதா கட்சியினர் உட்பட யாருக்கும் ஐயம் இருக்காது. (ஏனெனி்ல் தினமணி கூட எடியூரப்பாவை ஊழல் சுண்டெலி என்கிறது).

    ஆர்எஸ்எஸ்-சில் எடியூரப்பா ஆற்றிய தீவிர செயல்பாடு, அவரை அதன் அரசியல் பிரிவான பார’தீய’ ஜனதாவிற்கு கொண்டுவந்தது.

    1975-ல் சிமோகா முனிசிபல் கவுன்சிலர். 1994-ல் கர்நாடக சட்டமன்றத்தில் இரண்டாவது பெரிய கட்சியாக உருவெடுத்ததைத் தொடர்ந்து, எதிர்க்கட்சித் தலைவரானார்.

    2004 சட்டப் பேரவைத் தேர்தலில் பிஜேபி தனிப்பெரும் கட்சியாக உருவெடுக்க, மதச்சார்பற்ற ஜனதா தளமும்-காங்கிரசும் கூட்டணி ஆட்சி அமைத்தன. இந்தக் கூட்டணி பாதியில் முறிய பார’தீய’ ஜனதாவும், மதச்சார்பற்ற ஜனதா தளமும் கைகோர்த்தன. இதற்காக, இந்துத்துவா கொள்கையை வலியுறுத்தும் பார’தீய’ ஜனதாவோ, மதச்சார்பற்ற என்று பெயர் வைத்துக்கொண்டுள்ள தேவகவுடா கட்சியோ வெட்கப்படவில்லை. தேவகவுடாவின் மகன் குமாரசாமி முதலமைச்சராக, துணை முதலமைச்சரானார் எடியூரப்பா. இந்தக் கூட்டணியும் நீடிக்கவில்லை, சொன்னபடி, எடியூரப்பாவை முதலமைச்சராக விடவில்லை குமாரசாமி. இந்த நாடகத்தின் தொடர்ச்சியாக 2007 நவம்பரில் முதலமைச்சராக பதவியேற்றார் எடியூரப்பா.

    முதலமைச்சரான பின்னரும் அரை டவுசருடன் தோன்றி தான் ஒரு ஆர்எஸ்எஸ் அம்பி என்பதை காட்டிக்கொள்ள அவர் தவறியதில்லை. தென்னிந்தியாவின் முதல் பார’தீய’ ஜனதா அரசின் முதலமைச்சர் என்பதால், ஆளுநர் பரத்வாஜ் உள்பட பலரும் அவரை மிக தந்திரமாகக் காப்பாற்றி வந்தனர். என்ன செய்ய, பல ஆயிரம் கோடி ரூபாய் நாட்டு்க்கு இழப்பு ஏற்படுத்தியுடன், குடும்பத்தினர் சகிதமாக ஊழலில் ஈடுபட்டதாக லோக்அயுக்தா விசாரணை அறிக்கை குற்றம்சாட்டி விட்டதே? இதற்காக இல்லாவிட்டாலும் கர்நாடகத்தில் பல ஆண்டுகளாக நீடித்து வரும் உட்கட்சிப் பூசலுக்கு முற்றுப்புள்ளி வைக்கவும், எடியூரப்பாவின் பதவியை பறிக்க வேண்டிய நிர்ப்பந்தம் பார’தீய’ ஜனதாவிற்கு! அப்புறம் மற்ற கட்சிகளின் குடைச்சலை சமாளிக்க வேண்டிய தேவையும் இருக்கிறதே.

    சத்தியம் செய்வதாக சாமியையே ஏமாற்றிய எடியூரப்பா, தமது கட்சித் தலைமையையும் ஏமாற்ற முயற்சி செய்யாமலா இருந்திருப்பார்? எடியூரப்பாவிடம் இருந்து ஏன் பதவி விலகல் கடிதத்தை இன்னும் பெறவில்லை என்று,  பார’தீய’ ஜனதா தலைவரான நிதின் கட்கரியை, ஆர்எஸ்எஸ் தலைவர் மோகன் பகவத் காய்ச்சி எடுத்துவிட்டதாகவும் ஊடகங்களில் செய்தி வெளியானது.

    இந்த மோகன் பகவத் கடந்த ஜூன் மாதம் உதிர்த்த முத்து இது: "அறநெறிகளை கற்றுத் தந்து சமூக மாற்றத்தின் மூலமே ஊழலைக் கட்டுப்படுத்த முடியும் என ஆர்எஸ்எஸ் நம்புகிறது. இதற்கு அன்றாடம் ஆர்எஸ்எஸ் நடத்தும் ஷாகாவுக்கு செல்ல வேண்டும்" [The RSS believed that only through “social transformation” by teaching ethical values could corruption be tackled. a daily ‘shakha’ (RSS organised gathering) was the only way to bring about social transformation]

    அன்றாடம் அரை டவுசர் அணிந்து ஷாகாவுக்கு போய் வளர்ந்த எடியூரப்பாவின் ஊழல்தான் இப்போது புழுத்து நாறுகிறது என்றால் ஆர்எஸ்எஸ்சின் அறநெறிகளைப் பற்றி நீங்களே முடிவு செய்துகொள்ளுங்கள்!

    பின்குறிப்பு: அலைக்கற்றை ஊழல் வெளிச்சத்திற்கு வந்தபோது நீதியின் வாளை எடுத்து ஆவேசமாக சுழற்றிய தினமணி, எடியூரப்பாவின் ஊழல் அம்பலமானவுடன் ஒரு தலையங்கம் எழுதியது. அதன் சாரம்: ஊழல் என்பது கடவுள் போல சர்வ வியாபகமாகிவிட்டது. எனவே எடியூரப்பாவி்ன் ஊழலைப் பற்றியெல்லாம் நாம் அலட்டிக் கொள்ள வேண்டியதில்லை என்பதுதான். இருப்பினும் பார’தீய’ ஜனதா தன்மானத்தை இழக்கத் தயங்காத கட்சி என்பதை தினமணி ஒப்புக் கொண்டதை நாம் பாராட்டத்தான் வேண்டும்.

    ஜெயமோகன் அரவம்

    4 பிப்

    சுயமோகன் (ஜெயமோகன் என்றும் பாடம்) மருதையனின் நூல் வெளியீட்டு விழா உரை ஒன்றை கேலி செய்து மருதையப்பாட்டா… என்ற தலைப்பில் அண்மையில் எழுதியிருக்கிறார். அதில் மருதையனை கிராமத்துப் பெரிசு (பழமையில் இனிமை காண்பவர்) என சுட்டுகிறார். அதில் பெரிசுக்கு வாசிப்பு இல்லை என்றும், பெரிதாக வாசிப்பு இல்லை என்றும், பாழும் நாகரிகம் வந்து கெடுப்பதாக அவர் புலம்புவதாகவும், இயக்கவியல் பொருள்முதல்வாத பார்வையில் அல்லாமல், மனதுக்குப் பட்டதைச் சொல்வதாகவும் நக்கல் அடித்திருக்கிறார். இலக்கியம் என்றால் ராணிமுத்து வாசிப்பு என்று மருதையன் நினைத்துக்கொண்டிருப்பதாகவும் எள்ளி நகையாடுகிறார். இது ஒரு புறம் என்றால், நூ்ல் வெளியீட்டு விழாக் கூட்டத்தில் மருதையன் உரையை கேட்டவர்களையும் இழிவுபடுத்தியுள்ளார். “பெரிசு பசங்களிடம் வாசிக்கச் சொல்கிறது. வசைபாடுவதற்கு வாசிப்பு எதற்கு என்ற கொள்கை கொண்ட பசங்கள் அதை கேட்பதாக தெரியவில்லை” என்கிறார். பிறகு “சமூகத்தின் வளர்சிதை மாற்றம் பற்றி மார்க்ஸியம் முரணியக்க இயங்கியல் நோக்கில் சொன்னவற்றை எல்லாம் சொல்லப்போனால் வசவு (வினவு) தோழர்கள் பின்பக்க மணலை தட்டிக்கொண்டு எழுந்து சென்று விடுவார்கள்” என்கிறார்.

    வினவு தளத்தை தொடர்ந்து வாசிப்பவன் என்ற முறையிலும், மருதையனின் உரையை நூல் வெளியீட்டு விழாக் கூட்டத்தில் நேரடியாகக் கேட்டவன் என்ற முறையிலும் சில கருத்துகளை பதிவு செய்ய விரும்பியே இந்த விளக்கம்…

    கிராமத்துப் பெரிசின் அதிநீளமான தன்னுரையா?

    மருதையனின் உரை நிகழ்த்துக் கலை போன்றது. அதில் ஏற்படும் லயிப்பு மயக்கத்திற்குப் பதிலாக விழிப்பை ஏற்படுத்தக் கூடியது. ஏற்கும் கருத்துகளை ஒட்டியு்ம், மறுக்கும் கருத்துகளை வெட்டியும் வாதங்களை ஊடும் பாவுமாக நெய்தபடி சுழலேணி போல மேலேறிச் செல்லும் உரை அது. அவரது உரையில் இயக்கவியலின் அழகையே ஒருவர் காண முடியும். எடுத்துக் கொண்ட கருத்தின் குறிப்பான தன்மைகளையும், சிறப்பான தன்மைகளையும் பொதுவான தன்மைகளையும் காரண, காரிய விளைவுகளையும், தற்செயல் அவசியங்களையும் காட்டத் தவறியதில்லை அவரது உரை. அவரது எழுத்துகளும் அப்படியே. காழ்ப்புணர்ச்சியும், வளர்ச்சிக்கான மாற்றங்களை மறுக்கும் தன்மையும் அற்றவர்கள் இதை உணர்ந்திருப்பர். இதற்கு ம.க.இ.க.காரனாகவோ, வினவு தோழராகவோ இருக்க வேண்டிய அவசியமில்லை.

    அப்படியானால் மருதையனை எள்ளி நகையாடுமாறு ஜெயமோகனை தூண்டியது எது? காழ்ப்புணர்ச்சியும், வளர்ச்சிக்கான மாற்றங்களை மறுக்கும்  தன்மையுமே என்பது கூறாமலே விளங்கும்.

    மனதுக்கு பட்டதை சொல்கிறாரா மருதையன்?

    “இயக்கவியல் பொருள்முதல்வாத பார்வையில் அல்லாமல், மனதுக்குப் பட்டதைச் சொல்கிறார் மருதையன்” என்பது ஜெயமோகனின் ஆவலாதி. மனதுக்குப்பட்டதை சொல்வதென்றால் எப்படி? சான்றாக, ஜெயமோகன் தனது ஆர்எஸ்எஸ் மனதுக்குப்பட்டதை பல பதிவுகளில் சொல்கிறார். உதாரணத்திற்கு ஒன்று மீனவர் படுகொலைகள். இதில் ஆர்எஸ்எஸ் ஆட்சி மீண்டும் வருவது எப்போ? மோடி பிரதமராவது எப்போ? என கையற்றுப் புலம்புகிறார். ஜெயமோகனின் ஆர்எஸ்எஸ் மனதுக்குப்பட்டதை சொன்னால், அது இப்படித்தான் இருக்கும்.

    ஆனால் மருதையனின் உரையை நேர்மையாக அணுகும் ஒருவர் புரிந்து கொள்வது என்ன?

    மருதையனின் பேச்சில் நீங்கள் இப்படி நக்கல் அடிக்கும்படி என்ன
    இருக்கிறது? NCBH, க்ரியா பதிப்பகம் போன்றவற்றில் நானும் புத்தகம் தேடிஇருக்கிறேன். அனேகமாக நீங்களும் தேடி இருப்பீர்கள். கீழைக்காற்றுஎன்பதைப் பற்றி நான் கேள்விப்பட்டதில்லை, ஆனால் இடதுசாரிப் புத்தகங்களைவிற்கிறார்கள், ம.க.இ.க.வை விமர்சனம் செய்யும் புத்தகங்களை விற்கிறார்கள்என்கிறார். என்ன தவறு? ஓவியர் மருது என்பவர் நன்றாக படம்வரைந்திருக்கிறாராம். அது எனக்கும் உங்களுக்கும் பிடிக்கிறதோ இல்லையோஅவரது ரசனை அப்படி. நடுத்தர வர்க்கம் பிள்ளைகளை படி படி என்றுவிரட்டுகிறது என்கிறார். உண்மைதானே! விரட்டுங்கள், ஆனால் பாடங்களைத்
    தாண்டி புனைவுகளை, இலக்கியத்தை படிக்க வையுங்கள் என்று நீங்கள் கூடஅடிக்கடி சொல்வீர்கள். ஆர்காட்டு “நவாபுக்கு” இன்னும் மான்யம் என்கிறார்.

    “நவாப்” என்ன ஸ்பெஷல் என்று உங்களுக்குத் தோன்றவில்லையா? தொலைக்காட்சி(இளைஞர்கள்) மூளையை மழுங்க அடிக்கிறது என்கிறார். நீங்கள் தொலைகாட்சிஅதிகம் பார்ப்பதில்லை என்று சொன்ன நினைவு இருக்கிறது. “ஜனநாயகம் என்றால்
    என்ன? கௌரவம் என்றால் என்ன? நீதி என்றால் என்ன? போன்ற கேள்விகளுக்கு …அது எதுவும் தொலைக்காட்சியில் பேசப் படுவதில்லை. எதுவும் நின்றுவிவாதிக்கப் படுவதில்லை. ஏன் இவ்வாறு என்பது முக்கியமான கேள்வி.”

    என்கிறார். சரிதானே? அவர் சொல்லும் காரணத்தை நான் மறுக்கிறேன் – “இவ்வாறுசிந்திக்கும் திறனற்ற, சிந்திக்கும் தேவை அற்ற உழைக்கும் மிருகங்களைஉருவாக்குவதற்குத் தான் உலக முதலாளித்துவம் செயல்படுகிறது.” ஆனால்கேள்வியில் என்ன குறை காண்கிறீர்கள்? “உண்மையான மகிழ்ச்சியை பாப்கார்ன்
    தலைமுறை அறியாது!” என்பதை நீங்கள் மறுக்கலாம். ஆனால் கனமான விஷயங்கள்மேலும் மேலும் மலினப்படுகின்றன, அதற்கு ட்விட்டர், எஸ் எம் எஸ்,எல்லாமும் ஒரு காரணம், சென்சேஷன், 15 நிமிஷ பிராபல்யம் என்பதுதான் இன்றுஊடகங்களின் நோக்கம் என்று நீங்கள் நினைக்கவில்லையா? அவர் “நோக்கமற்ற
    இன்பவாதப் படிப்பினால் பலனில்லை!” என்று சொல்வதைத்தானே இன்னொரு விதமாகரமணி சந்திரனையும் கோவி.மணிசேகரனையும் பற்றி என்ன நினைக்கிறோம்? அதுவும் அவர் முதலாளித்துவத்திலும் நல்லஎழுத்தாளர்கள் உண்டு, அவர்களைப் படிப்பது அவசியம் (மறுத்துப்பேசுவதற்காகத்தான்) என்கிறார்.

    உங்களைப் பற்றி அவர் “இன்பவாதப் படிப்பு” என்கிறார். இதில் என்ன
    சந்தேகம்? உங்களைப் படிப்பதில் துன்பம் இருந்தால் யார் படிப்பார்கள்? :-) அப்பா அம்மா பரீட்சை என்ற நோக்கத்தோடு படி என்கிற மாதிரி இவர் புரட்சிஎன்ற நோக்கத்தோடு படிக்க வேண்டும் என்கிறார். ஒரு வேலை அதனால்தான் பாட்டாஎன்கிறீர்களோ?

    இவரது “எல்லா படிப்பும் ஒரு இலக்குக்கே (அதுஇவருக்கு புரட்சி)” மாதிரி ஒரு சீரியசானபேச்சைக் கிண்டல் செய்துஎழுதியதும் எனக்கு கொஞ்சம்ஆச்சரியமாக இருக்கிறது!”

    இது ஜெயமோகனின் ரசிகர் ஒருவர் அவரைப் பார்த்து எழுப்பியுள்ள கேளவி. அதுதான் அவர் இயக்கவியல் பார்வையில் அல்லாமல் மனதுக்குப்பட்டை கூறினார் என்று சொல்லிவிட்டேனே என எரிந்து விழுகிறார் ஜெ.மோகன். சரி அப்படி என்ன மருதையனின் உரையில் இயக்கவியல் பார்வைக்கு கேடு வந்து விட்டது?

    “நடுத்தர வர்க்கப் பெற்றோர்கள் பிள்ளைகளை அழைத்து வருகிறார்கள். அந்தப் பிள்ளையை ஆய கலைகள் அறுபத்து நான்கிலேயும் அதற்குள்ளே தயார் செய்ய வேண்டும் என்று நினைக்கிறார்கள். இப்போது ஆய கலைகள் புதிதாக வேறு அறுபத்து நான்கு உள்ளன. பழையவை அல்ல. கம்ப்யூட்டர், இங்கிலீஷ், ஃபிரெஞ்சு மொழி என்று பல கற்றுக் கொள்ளவேண்டும் இதுக்கான ஒலித்தகடுகள், வீடியோக்கள் இதையெல்லாம் வாங்கி எதற்கு தயார் செய்கிறார்கள்?

    பிள்ளையை விளையாட விடாமல் “படி படி” என்று கொல்கிறார்கள். இதையெல்லாம் பல நடுத்தர வர்க்கக் குடும்பங்களில் பார்க்கிறோம். நாமும் இங்கே படிக்க வேண்டுமென்று வலியுறுத்திப் பேசிக் கொண்டிருக்கிறோம். பின் என்ன பிரச்சனை? எதற்குப் படிக்கச் சொல்கிறார்கள் என்றால் படித்து முடித்த பின் வேலை. படித்து முடிக்கவே வேண்டாம். காம்பஸ் இன்டர்வியூவில் வேலை. முன்னாலேயே வேலை கிடைக்க வேண்டும். வேலைக்குப் போவதற்காக, நல்ல வேலைக்குப் போவதற்காக,  அமெரிக்கா போவதற்காக, பொருளீட்டுவதை உத்திரவாதம் செய்து கொள்வதற்காக, ஒரு வாழ்க்கை தகுதியைப் பேணிக் கொள்வதற்காகப் படி படி என்று சொல்கிறார்கள்.

    படிப்பு என்பதைப் பற்றிய பார்வை பெற்றோர்களிடம் இப்படி இருக்கிறது. இது படிப்பு அல்ல. இதை நான் நிராகரிப்பதற்காகச் சொல்லவில்லை. இப்போது இந்தக் காய்ச்சல் என்பது பத்தாம் வகுப்பிலிருந்தே தொடங்குகிறது. இது முன்னர் கிடையாது. பிள்ளைக்குப் பத்தாவது பரீட்சை என்றால் பெற்றோர் எங்கும் போவதில்லை. தாயும் சரி தந்தையும் சரி கூடவே இருந்து சொல்லிக் கொடுக்க ஆரம்பித்து விடுகிறார்கள். ஏனென்றால் போட்டி மிகுந்த உலகம். இதில் மதிப்பெண் வாங்கி வந்தால் தான் உண்டு. அரசுக் கல்லூரிகளில் ஒரு சீட்  கிடைக்க இவ்வளவு மார்க் வாங்க வேண்டும். இல்லையென்றால் சுயநிதிக் கல்லூரிகளுக்குச் சென்று பணம் கட்ட முடியாது. அரசுக் கல்லூரிகளில் வாங்க 98 மதிப்பெண் வேண்டுமென்றால் 97.5 வாங்கினாலும் போயிற்று, சீட் கிடைக்காது. அப்படி விரல் நுனியில் பையனை நெருக்கிக் கொண்டு செல்கிறார்கள்.

    மரு.ருத்ரன் சொல்லுவார் இதனாலேயே பிள்ளைகள் மனநோய்களுக்கு, மன அழுத்தங்களுக்கு, பதட்டங்களுக்கு சிறிய வயதிலேயே ஆட்படுகிறார்கள் என்று. அப்படித் தள்ளுகிறார்கள் பெற்றோர்கள். ஏன்? பிள்ளைகள் நலத்தின் பொருட்டுத்தான் செய்கிறார்கள். பிள்ளைகள் நலமாக இருக்க வேண்டும் என்று தான் செய்கிறார்கள். அப்படி படித்து முடித்து செய்கின்ற பணி என்னவென்றால் ஒரு முதலாளியினுடைய தொழிற்சாலை இயந்திரத்தின் போல்ட் நட்டாகவோ, அல்லது ஒரு வர்த்தக இயந்திரத்தின் உப உறுப்பாகவோ அல்லது ஒரு விளம்பர இயந்திரத்தின் பகுதியாகவோ வேலை செய்யப் படிக்கிறார்கள். அங்கே ஆக்கபூர்வமானது எதுவும் இல்லை. அவன் சொல்வதைச் செய்வதற்கு முன்னாலேயே தயார் செய்து கொண்டு போகிறோம்.

    இயந்திரத்தை முதலாளி கைக்காசு போட்டு வாங்குகிறான். ஆனால் இயந்திரத்தின் உப உறுப்புகளாகச் செல்லக் கூடியவர்கள் அது ஐ‌டி துறை ஊழியர்களாக இருக்கட்டும் வேறு யாருமாக இருக்கட்டும் எல்லாருமே தங்கள் சொந்தச் செலவில் தங்களைத் தயாரித்துக் கொண்டு போகிறார்கள். ஒரு மூன்று நான்கு ஆண்டுகளுக்குப் பிறகு மெக்கானிக்கல் இன்ஜினியரிங்கிற்கு செல்வாக்கில்லை. எலக்டிரிக்கல் இன்ஜினியரிங் படிக்க வேண்டும். அல்லது இன்ஜினியரிங் படிப்பு வேண்டாம் மல்டிமீடியா படித்தால் அதிக சம்பளம் வாங்கலாம். இன்ஸ்டிட்யூட்டில் ஒரு வருடம் படித்தால் நல்ல சம்பளம்.

    இந்தச் சந்தையிலே மலிவு விலையிலே இந்த உப உறுப்புகளை வாங்குவதற்காக இதை மட்டும் படித்தால் போதும் என்ற மனநிலையை முதலாளித்துவம் பயிற்றுவிக்கிறது”

     

    என்கிறார் மருதையன். இது மார்க்சிய இயக்கவியல் பார்வையில் அல்லாமல் ஆர்எஸ்எஸ்சின் இந்துத்வ பார்வையில் விளைந்த கருத்துகளா என்ன? இதில் முதலாளித்துவத்தை வீழ்த்தி கம்யூனிச சமூகத்திற்கு முன்னேறுவதற்கான ஆர்வம் தெரிகிறதா? இல்லை கணினி உள்ளிட்ட நவீன வளர்ச்சிகளை மறுத்துவிட்ட மீண்டும் தீப்பெட்டி ஒட்டப் போவோம் என்ற புலம்பல் தெரிகிறதா? அறிவியல் புனைகதைகள் என்ற பெயரில் மூடநம்பிக்கைக் கதைகளை எழுதி புளகாங்கிதம் அடைந்த ஜெயமோகனிடம் கருத்து கேட்டால் அவர் வேறு எப்படிக் கூற முடியும்?

    நல்லரவங்கள் பிளவுபட்ட நாக்குகளுடன்  காத்திருப்பது மருதையனுக்குத் தெரியாதா என்ன? அதனால்தான்

    “இதைச்‌ சொல்லும்போது நவீன மாற்றங்களை எதிர்த்து நான் பேசுவதாகப் புரிந்து கொள்ளக் கூடாது. நவீன மாற்றங்கள் வாழ்க்கையைக் கெடுத்து விட்டது என்று பழமைவாதியைப் போலப் பேசுகிறேன் என்று இருந்து விடக்கூடாது. அப்படி அல்ல. ஆனால், இந்த நவீன மாற்றங்கள் கேடான முறையில் மட்டும் திட்டமிட்டு நம் மீது ஒரு ஆயுதம் போலப் பிரயோகிக்கப் படுகின்றன”

    என்று திரிபுகளுக்கு வாய்ப்பின்றி தெளிவாகவே கூறுகிறார் மருதையன்.

     

    இன்ப நாட்டம் என எதைக் கூறுகிறார்?

    “அந்தக் காலத்தில் கண்டதை வாங்கிப் படித்துக் கொண்டிருப்பேன். ஒரு சமயம் ஒரு தோழருடன் ஒரு நூல் பற்றி விவாதிக்க வேண்டி இருந்தது. அதைப் படிக்காமல் ஏதோ Sunday அல்லது India Today  வைத்துப் படித்துக் கொண்டிருந்தேன். அப்போது அவர் நான் இன்ப நாட்டத்திற்காகவே படிப்பதாகக் கூறினார். அப்போது எனக்குப் புரியவில்லை. நாம் சீரியசாகத் தானே படிக்கிறோம். இதிலென்ன pleasure என்று நினைத்தேன். உங்கள் தனிப்பட்ட இன்பத்திற்காக நீங்கள் படிக்கிறீர்கள் என்று அவர் சொன்னார். அது உண்மை. அது ஒரு இலக்கற்ற படிப்பு. அப்படிப் படிப்பதிலேயே ரசனை கொண்ட ஒரு இலக்கியவாதக் கூட்டம் இருக்கிறது.

    அவர்கள் தான் இந்தக் கூட்டங்களை எல்லாம் நடத்துவது. சங்கீத சீசனில் ம்யூசிக் அகாடமிக்கு கச்சேரி கேட்க வருகிறார்கள் இல்லையா அது போல ஜெயமோகன் புத்தகம் போட்டால் ஒரு கோஷ்டி வரும். கூட்டம் கூட்டி, அவர் இலக்கியத்தைப் பற்றி விதந்து பேசுவார், அதை ததாரினானாவிற்கு தலையாட்டுவது போல தலையாட்டி ரசிப்பதில் ஒரு சுவை. அப்பறம் படிக்கும் பழக்கமே குறைந்து போய்விட்டது, நம் கலாச்சாரம் என்னவாகும் என்று தெரியவில்லை, புத்தகங்கள் கேரளாவில் நிறைய விற்கிறது, இங்கே விற்க மாட்டேன் என்கிறது, இலக்கியம் அங்கே வளர்கிறது இங்கே வளரவில்லை இந்த மாதிரி கவலைகளைப் பகிர்ந்து கொண்டு கிளம்பிப் போய் விடுவார்கள். இவர்கள் இளைஞர்களாக இருந்தாலும் சிந்தனதையில் கிழடு தட்டிப் போனவர்கள்”

     

    என்கிறார் மருதையன். ஜெயமோகனது ஆத்திரத்திற்கு காரணம் இதைப் படித்தவுடன் பளிச்சென விளங்கி விடுகிறது. “சமீப காலமாக பெரிசு சிற்றிதழ்களைக்கூட வாசிப்பதில்லை என்றும் தெரிகிறது. இலக்கியம் என்றால் ராணிமுத்து வாசிப்பு என்று நினைத்துக்கொண்டிருக்கிறார்” என ஜெ.மோகன் கோயபல்ஸ் வேலை பார்ப்பதற்கும் காரணம் புரிந்து விடுகிறது.

    கண்ணோட்டம்

    3 பிப்

    கண்ணோட்டத்து உள்ளது உலகியல்; அஃதிலார்

    உண்மை நிலக்குப் பொறை.

     

    பொருள்:

    கண்ணோட்டத்தினால் உலகியல் நடைபெறுகின்றது; கண்ணோட்டம் இல்லாதவர் உயிரோடு இருந்தால் நிலத்திற்குச் சுமையே தவிர, வேறு பயனில்லை.